Rom 2 | MYW | STEP | Kal yak kwasigum soum, magina kwasigumim tatoneim, peinan amsinap kalbaleb ma̱wana towen. Ta-ma̱wan bukwatimop aygan takaleiwag towen bikamta̱nim.

Romans 2

Yowbad nakaleiwag bwanabwein

1 Kal yak kwasigum soum, magina kwasigumim tatoneim, peinan amsinap kalbaleb ma̱wana towen. Ta-ma̱wan bukwatimop aygan takaleiwag towen bikamta̱nim.

2 Taninuways Yowbad ansinap, bweina bikamta̱nis takalbalebs, siyas nalel asisinap.

3 Awoum wananoum bukulana, “Bweina bakasigum takalbaleb mo bawtel ma̱wan ansinap towen, Yowbad igaw bikamtan towen, yey gog nag.” Awoum kulivan ma̱wan.

4 Awoum kudokes tougwey Yowbad, peinan singay iyama̱num waseg yak, ikapatul, ikalin nuwan yak. Iyama̱num waseg yak va̱gan kid bukulavew amsinap kalbaleb. Nag gog, singay takakon yak, mapun singay Yowbad bikatimop amsinap kalbaleb, igaw tutan bikatkines gamag asisinap, inakaleiwag didumwal waseg.

6 Yowbad bimapuds tatanok tatanok ya̱kids ma̱wan dawotets. Kukin bitawotet bwein o bitakapatul va̱gan bitakamnat o Yowbad bikavasid o mwamovad bisigeg, e, Yowbad mo bisekeid mwamovad nag beikous. Tage kukin bitanineiv daked tatoneid, o bitapiyev Yowbad ansinap mounid, o bitakanaway sinap kalbaleb, e, mo singay Yowbad bikamta̱nid.

9 Kalisiy gamag takalbalebs simouvit mo bilivatus, abes singay bigeg, wanmugwana min-Yudiy, wankuyeim ven babaw gimgilis.

10 Tage toubweins bilivatus sikamnat son yakawanes mo beitaw nuwes, wanmugwana min-Yudiy, wankuyeim ven babaw gimgilis.

11 Yowbad nakaleiwag ven babaw wasigeis katanoka ivkek.

12 Min-Yudiy ikakins Yowbad nakaleiwag; kukin beivag asisinap kalbaleb mo bimta̱mats, peinan bo isiplaves Yowbad nakaleiwag. Ven mwasanin gimgilis nag ikakins Yowbad nakaleiwag, bivag asisinap kalbaleb mo bimta̱mats-vak tasiyas.

13 Tasiyas Moses nakaleiwag iliganesa mav, nag mamagina tadidumwals tasiyas, nag. Misinaka takanaweins Moses nakaleiwag, Yowbad mo bidok tadidumwals tasiyas.

14 Tobwag ven gimgilis kalisiy nag ikakins Moses nakaleiwag, tage tatineis-wan biwteles bo ma̱wana Moses nakaleiwag, mo ivag sikaleiwag ibwein wasigeis tasiyas.

15 E, bitakin kaleiwag bwein waninous, o ninous tatineis ikatimlakes mo ikakins takinew asisinap kalbaleb, o adok bwanabwein. E, ninous bikatimlakes, igaw tutan Yowbad bikatukin nanouds aveiyag nitasowum nises. E, Yowbad bidibek Yeisuw Kelis mo bikatukin, bikaleiwag, ma̱wana allivan, aggeiguy liva̱nen Yowbad bwanabwein.

Min-Yudiy Moses nisekes sikaleiwag

17 Kal takatimlakay yak bukudokeim kid gum-Yudiy ya̱koum, o kudoki Moses nakaleiwag bikatinabweim, o taga̱gas yak peinan Yowbad nagamag yak, o nanon Yowbad kukwakin o Moses nakaleiwag kukwakin ikous, mapuna kukwaves aw-sinap bwanabwein, o kukwakin tamgwayein kaw yak, o tadadubs sikamnat yak, o takatimlakein sinap tabla̱bols wasigeis o gamagal wasigeis, peinan Moses nakaleiwag waseg kudoki sinap mounid nises.

21 Yak kukwatimlakes gamag mwasanin, adok nag bukwatimlakeim tatoneim. Kuguyes gamag awoum biba̱kews, adok bo kuba̱kew, ne?

22 Kulana, “Awoum kwaninavay mav,” adok bo kwanavay mav, ne? Kwasigum tobwag yowbad, adok bo kuba̱kew waseg tobwag yowbad nabunatum, ne?

23 Kukwayapam sinap peinan kukwakin kid Moses nakaleiwag, adok bo kusiplev nakaleiwag, magina kuyageg Yowbad ne?

24 Bukitab waseg livneimiy min-Yudiy yakamiy, mamagina:

“Ven mwasanin gimgilis bo iyages Yowbad yagan,
peinan amisinap kalbaleb.”
25 Ebelam nakabivatus kubwabwes momwamiy. Sinap towen bwein magat bukwanawes Moses nakaleiwag. Kukin gog bukusiplaves Moses nakaleiwag, nag bivag mikabivatus, bo biyadeveimiy.

26 Ma̱wan magin, kukin kal nag ivag Ebelam nakabivatus mo ikanow Moses nakaleiwag, tadok nakabivatus Ebelam waseg gamag towen, ne?

27 Gamag tasiyas nag Ebelam nakabivatus wawous tage ikanawes Moses nakaleiwag, mo biyateleimiy peinan nakabivatus wawoumiy o Moses nakaleiwag buk-nen nises wasigeis yakamiy, o kusiplaves gog.

28 Kavel bibob momwan ma̱wana gum-Yudiy tage nag gum-Yudiy tatonen. Ebelam nakabivatus wakaleivim-wan nag ikadilok, nag.

29 Tage gum-Yudiy wanuwan mounid gum-Yudiy tatonen; o Ebelam nakabivatus kadiloka beisiw waka̱teid o wakululuwad, kaleivid awoum. Yakawanads Yowbad waseg, nag gamag wasigeis.